Хариулт: Эмээр үр зулбуулахад сөрөг нөлөө байлгүй яахав. Хэвийн явагдаж байсан физиологийн процессыг зулбуулаад хаяна гэдэг сайн зүйл биш. Нэгдүгээрт энэ эмийг хэрэглэх тодорхой хугацаа тухайн биед тохирох эсэхийг мэдэх хэрэгтэй. Насны онцлог, хэдэн удаа төрсөн гэх мэт олон юмыг харж байж энэ эмийг хэрэглэдэг юм. Сөрөг үр дагаврын тухайд цус алдана, саванд юм үлдэх магадлал өндөр, умайн архаг үрэвсэл, наалдац, сорвижилт үүсдэг учраас үргүйдэлд хүргэж болно. Ер нь энэ эмийг эмчийн хяналтанд 8 долоо хоног хүртэлх жирэмсэнд л хэрэглэдэг юмаа.

Асуулт: Би 30 настай 2 хүүхэдтэй, 2 удаа үр хөндүүлсэн. Дахиад төрөхийг хүсдэг ч 5 сартай болтол нь босч чаддаггүй, юм ч идэж чаддаггүй хордлого өгдөг. Саяхан зуун айлын эмнэлгийн 2 давхарт байрлах “Хүнлэг” хувийн эмнэлгээр аборт хийлгэхээр 23 мянган төгрөг өгсөн. Гэтэл эмч нь 20-иод минут ухаж зовоочихоод чиний сав ямар хачин юм бэ? Миний багаж хүүхдийн чинь хажуугаар өнгөрээд байна. Мөнгөндээ зулбуулах эм авч уу гээд 6 ширхэг эм өгсөн. Зааврын дагуу 4 хоног уухад сав базлаж өвдөөд юу ч гараагүй. Нөгөө эмч рүүгээ ярьтал албан ёсоор зөвшөөрөгдсөн эм, одоо савны чинь ам онгойсон байлгүй, хүрээд ир гэсэн. Гэвч би өөр газар очиж соруулуулсан. Ийм мөнгөний төлөө хүн алахаас буцахгүй эмч нарт хаанаас эмнэлэг ажиллуулах зөвшөөрөл өгдөг юм бэ? Одоо миний сав байнга базлан өвдөж байна. Дараа нь очсон эмчдээ эмний цаасыг үзүүлэхэд хугацаа нь дууссан байна гэсэн. Одоо би ямар эмчилгээ хийлгэх вэ? Зөвлөгөө өгөөч.

Хариулт: Олон дахин үр хөндүүлэх нь олон сөрөг үр дагаврыг дагуулж байдаг. Хордлого гэдэг чинь хүүхдэд эхийн бие дасан зохицох урвал явагдаж буй юм. Үүнийг эмчилдэг олон төрлийн арга бий. Нөгөө талаас биеийн чалх сул дорой учраас хордлого явагддаг. Тийм учраас дархлаа сайжруулах эмчилгээг сайн хийлгэх хэрэгтэй. Энэ эмнэлгийн хувьд эмчийн ур чадвар дутсан байна. Зулбуулдаг эмний тухайд Монголын зайлшгүй шаардлагатай эмний жагсаалтад багтаж хэрэглэхийг албан ёсоор зөвшөөрдөг юм. Манай эмэгтэйчүүд өөрсдөө эмний хугацаа энэ тэрийг сайн харж байх хэрэгтэй. Одоо таны хувьд саванд тань юм үлдсэн байж магадгүй юм. Үүнийг цаг алдалгүй үзүүлж оношлуулаад тохирсон эмчилгээг хийлгэ. Ер нь бол үр хөндүүлсэний дараа үрэвслийн эсрэг эмчилгээ заавал хийлгэх шаардлагатай байдгийг ойлгох ёстой юм шүү.

Асуулт: Би 27 настай, төрж үзээгүй, 3 удаа үр хөндүүлсэн. Хамгийн сүүлд 8 сард үр хөндүүлсэн гэтэл үүнээс хойш сарны тэмдэг ирэхгүй, хэвлий орчмоор маш хүчтэй хатгаж өвдөөд байна. Эмчид үзүүлж дааврын шинжилгээ өгсөн чинь prolactin 45.2, LH 6.2 болсон байна гэсэн. Одоо bromkration гэдэг эм ууж байгаа. Дааврын өөрчлөлт юунаас болдог вэ? ямар үр дагавартай вэ? Дахин жирэмслэх болов уу?

Хариулт: Олон удаа үр хөндүүлэх нь дааврын хямралд оруулдаг. Мөн савны үрэвсэл наалдац, савны дотор салстын гэмтэл сорвижилт болох гол шалтгаан болно. СТ ирэхгүй байгаа шалтгаан нь умайн хөндий дотор наалдац үүссэн байж магадгүй. Ийм үед СТ гадагшлахгүй хирнээ хэвлийгээр хүчтэй хатгаж өвддөг юм. Шинжилгээний хариунаас харахад даавар ихэссэн нь харагдаж байна. Одоо бол таны хувьд дааврын өөрчлөлт, наалдац үүссэн эсэхээ хоёуланг нь үзүүлж, хавсарсан эмчилгээ хийлгэх хэрэгтэй. Дахин дахин үр хөндүүлснээс хөхөнд жирэмслэлттэй холбоотой өөрчлөлт орж, өнчин тархин дахь сүү боловсруулах пролактин гэдэг даавар ихэсдэг. Үүнээс шалтгаалж даавар хямардаг. Дахин жирэмслэхээс өмнө энэ үүсээд байгаа асуудлуудаа сайтар үзүүлж, бүрэн төгс эмчлүүлэх ёстой.