Асуулт: Би одоогоос жилийн өмнө 3 сарын зайтай хоёр удаа аборт хийлгэсэн. Сарын тэмдэг хэвээр ирдэг ч сүүлийн хэдэн сар бөөрний орчимд байнга хатгаж өвдөөд байна. Нэг эмчээс асуусан чинь байнга ингэж өвддөг сав байх гэсэн. Би яах хэрэгтэй вэ? Танай эмнэлэгт хандах хүсэлтэй байна, хаягаа тодорхой явуулаач. Ойрын нэг жилдээ жирэмслэе гэвэл болох уу?

Хариулт: Сав өндгөвчний дайвар үрэвсэлтэй үед өгсөх замын халдвараар цусаар дамжин бөөр үрэвсэх хандлага бий. Тийм учраас бөөрний хавьд өвдөж байгаа болов уу. Савны үрэвслийн үед ууц нуруугаар өвдөх хандлага илэрдэг. Тийм учраас манай эмнэлэгт /320978, 88118388/ хандаж үзлэг хийлгээд эмчлүүлж жирэмслэх бэлтгэлээ хангаж болно. Бид танд жирэмслэх талаархи цогц зөвлөгөө болон өндгөн эс боловсрох хугацааг тогтоож өгнө. Би таныг жилийн дотор жирэмслэх боломжтой гэж бодож байна.

Асуулт: Би 25 настай. 6 сарын өмнө үр хөндүүлсэн. Миний асуултанд хариулж өгөөч.
1. Одоо жирэмслэлтээс хэрхэн сэргийлэхээ мэдэхгүй байна. Бэлгийн харьцаанд орж байгаа. Нэг бол нөхөр маань гадуур нь тавьж үгүй бол би орсон үрийн шингэнийг нь шахаад гаргачихдаг. Энэ зөв үү, буруу юу? Өөр ямар арга хэрэглэх хэрэгтэйг хэлж өгөөч? 2. Үр хөндүүлсний дараа миний хөх аймаар суларсан. Хүүхэд хөхүүлж байсан хүн шиг л болчихсон. Ямар арга хэмжээ авах вэ? 3. Үр хөндүүлснээс хойш ч юм уу сексийн дараа зүүн өндгөвч аймаар хүчтэй биш ч мэдэгдэм хөндүүрлээд өвдөөд байдаг болчихлоо. Энэ юутай холбоотой вэ? Яах хэрэгтэй вэ?

Хариулт: Гадуур нь тавиулах, эсвэл дүлж гаргах зэрэг нь жирэмснээс хамгаалах арга биш, найдваргүй. 25 настай, төрөөгүй хүн жирэмснээс хамгаалах дааврын бэлдмэл уух нь тохиромжтой. Жирэмснийг таслахад хөхний чинэрэлт багасаж сулрах нь хэвийн явдал тул ямар нэг арга хэмжээ шаардлагагүй. Хэрэв өвдөлт тань байгаад байгаа бол сарын тэмдгийн өмнө эсвэл илүү өвдөх үедээ эмчдээ үзүүлээрэй.

Асуулт: Би 21 настайдаа үр хөндүүлсэн. Түүнээс хойш 6 жил бэлгийн харьцаанд ороогүй. СТ-ийн хугацаа тогтворгүй. Сүүлийн үед бага хэмжээтэй ирж байгаа. Нуруугаар их өвддөг, цагаан юм их гардаг болсон. Энэ байдал ирээдүйд хүүхэд төрүүлж чадахгүй болчих вий гэхээс санаа маш их зовж байна. Зөвлөгөө өгөөч.

Хариулт: Эмнэлгийн хэлээр долоо хоногт 2-3 удаа тогтмол бэлгийн харьцаатай 12 сар болоход жирэмслэхгүй бол үргүйдлийн асуудал яригдаж эхэлдэг. Харин энэ хүний хувьд бүхэл бүтэн 6 жилийн турш огт бэлгийн харилцаанд ороогүй хүний хувьд үргүйдлийн асуудал байна гэж хэлэхэд хэцүү юм. Тийм асуудал байхгүй байх аа. СТ тогтворгүй гэдэг бол харьцангуй ойлголт. Сарын тэмдэг сар болгоны 15-нд ирдэг бол нэг талаараа тогтвортой юм шиг санагдаж болно. Хэрэв мөчлөг 21 эсвэл 25, 28 хоногийн мөчлөгтэй бол сар бүрийн 15-д ирэхгүй. Харин 15-наасаа урагшаагаа 10 хоног эсвэл 7 хоногийн өмнө ирнэ гэсэн үг. Энэ бас л тогтвортой гэсэн үг. Цагаан юм их гарч байгаа бол шинжилгээ өгөх хэрэгтэй. 21 насандаа үр хөндүүлсэндээ айж санаа зовох хэрэггүй байх.

Асуулт: Би 28 настай. Сарын өмнө үр хөндүүлсэн. 6 долоо хоногтой байхад нь соруулсан юм. Анхны жирэмслэлт байсан боловч авахуулахаас өөр арга байгаагүй тул авахуулсан. Тэгээд үр хөндүүлснээс 3 хоногийн дараа бэлгийн харьцаанд орсон. Найз залуу маань хол ажлаар явсан тул дахин бэлгийн харьцаанд ороогүй. Одоо үр хөндүүлснээс хойш сар 7 хонож байгаа боловч СТ ирэхгүй байна. Би жирэмсэн болсон юм болов уу гэж санаа зовоод байна. Үр хөндүүлснээс хойш 3 дахь хоногт бэлгийн харьцаанд ороод жирэмсэн болох магадлал хэр вэ. Надад зөвлөөч.

Хариулт: Үр хөндүүлсний 3 дахь хоног дээр жирэмслэхгүй. Яагаад гэвэл сарын тэмдгийн мөчлөг ирдгээрээ л ирэх ёстой. Харин үр хөндүүлснээс хойш 15 дахь хоногт жирэмслэх магадлалтай. Тэгэхээр би таныг жирэмслээгүй гэж бодож байна. Харин абортын дараа наалдац үүссэн бол биений юм ирэхгүй. Ер нь үр хөндөлт гэдэг физиологийн хийгдэх ёстой ажилбар биш шүү дээ. Хэвийн хөгжиж байгаа үр хөврөлийг хөгжлийг нь зогсоож мэс ажилбараар авч хаядаг. Үүнд эмэгтэйчүүдийн даавар ялгарч зохицуулалт хийж байдаг өнчин тархи дасан зохицох, хүлээн авах боломжгүйгээс биений юм хойшлох бүр ирэхгүй байх ч үе бий. Тийм учраас яаралтай мэргэжлийн эмчид хандаж эход харуул.

Асуулт: Би 23 настай. 2004 онд 45 орчим хоногтой жирэмсэн байснаа соруулж авахуулсан. Тэрнээс хойш сарын тэмдгийн хэмжээ багасах болж 3 удаа шинжилгээ өгч үзлэг хийлгэсэн ч эмч нар тодорхой онош хэлээгүй. Гэвч энэ ямар нэг хор нөлөөтэй байх талаар санаа зовоод байх юм. Зөвлөгөө өгөөч?

Хариулт: 23 настай залуухан эмэгтэй байна. Үр хөндөлтийн үед савны дотор талын салст механик гэмтэл нөхөн төлжих салстад нөлөөлснөөс биений юм бага ирдэг. Мөн үрийн хоолойд архаг үрэвсэл үүссэнээс болж битүүрэх аюултай байна. Түүнчлэн сарын тэмдгийн дараах өндгөвчний үйл ажиллагааны хямрал нь үүнийг багасах шалтгаан болдог. Саван дотор хэсэгчилсэн наалдас үүссэн бол сарын тэмдгийн дараа бор юм гарна. Та эдгээр шинж тэмдгийг сайн ажигла. 3 удаа шинжилгээ хийлгэхэд эмч ямар нэг өвчний онош хэлээгүй гэж байна. Уг нь үрэвсэл байвал мэдэгдэх ёстой доо. Миний зүгээс чамд үрэвслийн эмчилгээ заавал хийлгэх шаардлагатайг зөвлөе. Цаашид үргүйдлийн эмнэлэгт хандаж үрийн хоолойгоо шалгуулах нь хэрэгтэй. Ирээдүйд эх болох хүн учраас би ингэж зөвлөж байна.

Асуулт: Жирэмсэн болсон хоногийг яаж олдог юм бэ? Ойролцоогоор 2 сартай болж байх шиг байна. Миний хувьд гаргах бодолтой ч үүнээс болж бид 2 салж байгаа. Тэгээд яах ч аргагүй авахуулах болчихлоо. Би хаана хандах вэ?

Хариулт: Яг хэзээ, хэд дэх жирэмсэлснийг тогтоох бололцоо бий. Харин та сүүлийнхээ биений юмыг сайн мэдэж байх ёстой. Ийм асуудлаас болоод салж байгаа нь харамсалтай. Хүүхдээ авахуулна гэж байгаа нь бүр ч харамсалтай байна. Танд хандаж хэлэхэд үр хөндөлтийг хамгийн сайн хийж сурсан эмч гэж хаана ч байдаггүй, доктор профессор эрдэмтэн хэн ч “би хийж сурсан” гэж хэлэхгүй. Яагаад гэхээр энэ бол хамгийн осолтой, найдвар 100 хувь биш ажилбар байдаг. Умайн хөндийгөөс ургийг хусч соруулж цэвэрлэхдээ дандаа гарын баримжаагаар хийдэг учраас ямар нэг эрсдэл гарах үндэслэлтэй ихтэй байдаг. Тийм учраас тэнд сайн, энд сайн гэж хэлэх бололцоо алга. Тэгэхээр та эмнэлгээ өөрөө сайн сонгоорой. Бас тухайн эмнэлгийнхээ багажны ариутгал халдваргүйжүүлэлтийг сайн анхаарах хэрэгтэй. Эхлээд харъяа дүүргийнхээ эмнэлэгт хандсан нь дээр болов уу.

Асуулт: Би 24 настай, жилийн өмнө үр хөндүүлсэн. Үүнээс хойш сарын тэмдэг ирсний дараа бага багаар цус гараад байх болсон. Энэ ямар нэг өвчний шинж тэмдэг мөн үү? Бас анхныхаа хүүхдийг авахуулсан хүн дахиад хүүхэд гаргахгүй тохиолдол байдаг гэх юм. Энэ талаар зөвлөгөө өгөөч?

Хариулт: Ингэж бага багаар цус гарах нь үр хөндөлтийн сөрөг үр дагавар хор уршгийн нэг, архаг үрэвслийн шинж тэмдэг мөн. Мөн сарын тэмдгийн дараа бор ялгадас ч гардаг. Анхныхаа хүүхдийг үр хөндүүлэх нь тийм сайн зүйл биш. Яагаад гэхээр хэвийн явагдаж байгаа процессыг хүчээр таслан зогсоох нь маш олон сөрөг үр дагаварыг дагуулна. Ялангуяа савны архаг үрэвсэл үүсэх нь элбэг тохиолддог . Анхны үр хөндөлтийн онцлог нь савны амсрын агшилт сайн байдаг учраас шавхарга үлдэх хандлага бий. Тийм учраас ихэнхдээ үргүйдэлд хүргэх аюултай байдаг. Таны хувьд эртхэн мэргэжлийн эмчид хандвал ямар ч шалтгаантай байсан эмчилж анагааж болно шүү дээ.

Хариулт: Ингээд зулбуулаад, үр хөндүүлээд байх нь сайн зүйл биш. Цаашдаа жирэмснээс хамгаалах нь бүү хэл жирэмсэн болохгүй байх аюултай байдаг. Хүссэн цагтаа үр хүүхэдтэй болж чадахгүй байна гэдэг хамгийн харамсалтай зүйл. Ийм байдалд хүрэх аюулыг өөрөө хийгээд байна гэдэг бүр ч харамсалтай санагддаг. Ер нь гэр бүл төлөвлөлтийг нарийн сайн ойлгож, эмчийн зөвлөгөөг авах нь манай залууст нэн шаардлагатай зүйл. Жирэмснээс хамгаалах маш олон төрлийн эм бэлдмэл байдаг. Эмчээс зөвлөгөө авч өөрийн биедээ тохирсоныг нь сонгох хэрэгтэй. Мөн үр хөндүүлсэний дараа заавал үрэвслийн эсрэг эмчилгээ хийлгэж байх ёстой шүү.

Хариулт: Аборт хийлгэж байгаагаа сарын тэмдэг гэж тооцох хэрэгтэй. Үүнээс хойш мөчлөгөөрөө ирэх ёстой. Гэхдээ бага зэрэг хойшлох асуудал байдаг. Мөн абортны дараа умайн хөндий наалдах, өндгөвчний үйл ажиллагаа хямрах асуудал гардаг. Тийм учраас энэ бүхнийг аборт хийлгэсэн эмч дээрээ очиж хянуулах шаардлагатай. Эход харуулах, өөр дагалдах шинжилгээнүүдийг өгөх хэрэгтэй.

Асуулт: Жилийн өмнө үр хөндүүлсэн. 14 хоногийн өмнөөс охидын ерөндөг тавиулахаар докцилина эм ууж, мөөгөнцөрийн эсрэг эмчилгээ хийлгэсэн. Гэтэл миний сарын тэмдэг ирэхгүй бас хөх хөндүүрлэх боллоо. Би хүсээгүй хүүхэд гаргамааргүй байна, эм их уусан болохоор эрүүл хүүхэд төрнө гэдэгт эргэлзэж байна. Тэгэхээр вакум соруулах аргаар хаана үр хөнддөг вэ? Дараа нь шууд ерөндөг тавиулж болох уу? Сав агшааж, үрэвсэл, наалдацаас сэргийлж ямар эмчилгээ хийлгэх вэ? Өгсөх замаар миний мөөгөнцөр улам ихэдвэл яах вэ?

Хариулт: Нэгдүгээрт охидын ерөндөг гэж юм байдаггүй. Хоёрдугаарт ингэж байн байн үр хөндүүлэх нь муу үр дагавар дагуулдаг. Залуухан, төрж үзээгүй хүн юм шиг байна. Тийм учраас жирэмснээс хамгаалах арга, гэр бүл төлөвлөлтийн талаар эмчээс маш сайн зөвлөгөө авах хэрэгтэй. Үнэхээр хүсээгүй жирэмслэлт болсон бол үр хөндөхөөс өөр аргагүйд хүрэх л байлгүй. Миний зөвлөхөд үр хөндөлт бол ортой, магадлан итгэмжлэгдсэн, төрөх эмнэлгүүдэд хийх ёстой ажилбар. Хаа дуртай газраа очоод л хийлгэх юм бол дараа нь гарах үр дагавар муу байдаг юм шүү. Абортын дараа шууд ерөндөг тавьж болдоггүй, энэ нь үрэвсэл даамжруулах хандлага болдог учраас татгалзах хэрэгтэй. Абортоо чанартай, эрүүл ариун орчинд хийлгэх хэрэгтэй. Дараа нь абортын дараах хүндрэлээс урьдчилан сэргийлж хяналтанд байж үрэвсэлээс урьдчилан сэргийлэх ёстой. Та аборт хийлгэснийхээ дараа манай эмнэлэгт /Амин маргад: 320978, 88118388/ үрэвсэл, мөөгөнцөрийн эсрэг эмчилгээг үр дүнтэй хийлгэж болно.