Хариулт: Ер нь бол эрэгтэй, эмэгтэй хүн огт үргүй байх нь маш ховор тохиолдол. Эмэгтэй хүн төрөлхийн өндгөвчгүй бол үргүй гэж үздэг. Хэрвээ өндгөвчтэй л бол өндгөн эс байж л байдаг, харин үр тогтоох чадваргүй гэж хэдийд үздэг вэ гэхээр өндгөн эс нь байгаа хирнээ эр бэлгийн эстэй нийлж үр тогтохгүй үед ингэж үздэг. Харин эрэгтэй хүний хувьд төмсөгөнд эр бэлгийн эс огт боловсрохгүй байх, эсвэл олдмолоор гэмтэл авах, химийн хортой эм тариа хэрэглэсэн, багадаа гахайн хавдар хүндээр туссан зэргээс шалтгаалж үргүй болох тохиолдол бий. Гэхдээ эмэгтэй хүний үргүйдлийг оношлоход шат дараалсан хугацаа шаарддаг. Эрэгтэй хүнийх бол зөвхөн эр бэлгийн эсийн шинжилгээгээр мэдэх бололцоотой.

Асуулт: Би 23 настай, нөхөртэй. 2006 онь 4 сард анх удаа, мөн 9 сард дараалан үр хөндүүлсэн. Хоёр дахь жирэмслэлтийг эмчийн зөвлөснөөр зулбуулдаг эм уусан. 7 хоногийн дотор гарч дууссан ч маш их өвдөж эмнэлэгт хэвтсэн. Тэгэхэд эмч өндгөвчинд чинь уйланхай үүсчихэж гэж хэлсэн. Одоо бид хүүхэдтэй болох гээд огт болохгүй байна. Сарын тэмдэг хэвийн ирж байгаа. эсвэл уйланхайнаас болоод жирэмслэхгүй байна.

Хариулт: Анхны жирэмслэлтээ хөндүүлсэн, дараа нь зулбуулах аргаар ахин үр хөндүүлжээ. 7 хоногийн дараа гарч дууссан гэж байгаа ч давтан эход хянуулж эм нь үр дүнгээ өгсөн эсэхийг эмчдээ хянуулаагүй юм шиг санагдлаа. Миний бодоход саванд тань юм үлдсэн байх. Энэ үед маш их өвддөг. Саванд үлдсэн юмнаас үрэвсэл үүсээд үрийн хоолой битүүрсэн байх аюултай. Мөн өндгөвчинд үүссэн үрэвслийн болон дааврын гаралтай уйланхай өндгөн эсийн боловсрох үйл явцад саад болох шалтгаан болно. Тэгэхээр бүсгүй та тэр эмчийн оношийг баталгаажуулж нарийн мэргэжлийн эмчид үзүүлж эход харуул. Уйланхай байх юм бол шимэгдүүлэх эмчилгээ хийлгэнэ. Савны архаг үрэвсэл ч байж болно. Биений юм хэвийн ирж байгаа ч өндгөвчинд өндгөн эс боловсрохгүй байх тохиолдол бий. Ямартай ч нарийн мэргэжлийн эмчид сайтар үзүүлж дараа нь тохирсон эмчилгээг үр дүнтэй хийлгэх хэрэгтэй юм байна.

Асуулт: Би 2 жил жирэмслэхгүй байна. 2 жилийн өмнө аборт хийлгэж байсан. Хүмүүс жирэмсэн болгодог АНУ-ийн цинк,сэлэн гэсэн эмүүдийг хэрэглээд хүүхэдтэй болсон гэх юм. Үнэн болов уу? Би хүүхэдтэй болмоор байна. Яах вэ?

Хариулт: Хоёр жилийн турш турш хамгаалалтгүй бэлгийн харьцаанд ороод жирэмслэхгүй байгаа бол үргүйдэл гэж үзнэ. Өмнө нь жирэмсэлж байсан бол хоёрдогч үргүйдэл гэж үзнэ. Аборт хийлгэснээс болж үргүйдлийн шалтгаан болж болно. Ер нь эмэгтэйчүүдийн эмчид хандаж өндгөвчний үйл ажиллагаа, үрийн хоолойгоо хянуул, өөр дагалдах шинжилгээ хийлгэх хэрэгтэй болжээ. Дээрх эмүүдийн хувьд яг хүүхэдтэй болгох гэсэн зориулалттай эм биш. Туслах чанараар хэрэглэдэг. Энэ эмийг хэрэглээд хүүхэдтэй болсон гэж ярьсан хүмүүс аяндаа засрах шалтгаантай байж байгаад тэр нь эдгэрсэн байх. Таны хувьд бол жирэмслэхгүй байгаа шалтгаанаа эхлээд мэргэжлийн эмчид хандаж оношлуулах хэрэгтэй.

Асуулт: Би 29 настай. 1999 онд охинтой болсноос хойш дахин жирэмслээгүй. Урьд нь дандаа ерөндөгтэй байсан. Сексийн үед өвдөлт өгөөд байсан учир авахуулсан. Өнгөрсөн 12-р сараас хойш хамгаалалт хэрэглээгүй. Учир нь нөхөр маань 2 сар хөдөө ажиллаад 14 хоног амардаг. Нөхрийгөө байхад бид өдөр бүр бэлгийн харьцаанд ордог. Зарим хүмүүс энэ нь хүүхэдтэй болоход нөлөөлдөг гэх юм Одоо бид хүүхэдтэй болохыг маш их хүсэж байгаа болохоор зөвлөгөө өгөөч.

Хариулт: Эмэгтэй танд хамгийн түрүүнд жирэмслэхгүй байгаа шалтгаанаа тодруулахын тулд мэргэжлийн эмчид хандах хэрэгтэйг хэлмээр байна. Ерөндөгтэй үед харьцаанд ороход өвдөнө гэдэг ямар нэг үрэвсэлтэйг нотолж байна. Тэгэхээр та ерөндөгөө авахуулаад л үрэвслийн эсрэг эмчилгээ хийлгэх шаардлагатай байжээ. Спираль авсны дараа үрэвсэл сэдрэх нь олонтаа. Түүнчлэн үрийн хоолой битүүрсэн өндгөвчний үйл ажиллагаа алдагдсан ч байж болно. Үнэхээр эрүүл байвал өндгөн эс боловсрох үед харьцаанд ороогүй байж мэднэ. Таны нөхрийн амралтын 14 хоног энэ хугацаатай зөрдөг байж болох талтай. Харин өдөр бүр бэлгийн харьцаанд орсноор эр бэлгийн эсийн чанар муудаж, үр тогтохгүй байна гэдэг нь их харьцангуй ойлголт юм шүү. Ер нь бол жирэмслэх л ёстой. Тэгэхээр эхлээд та өөрөө үргүйдлийн эмнэлэгт хандаж шаардлагатай шинжилгээнүүдийг шат дараалан хийлгүүлээрэй. Эрүүл биед спиралийг 5 жил болгоод авахуулах хэрэгтэй гэж үздэг. Таны 7 жил гэдэг нь нөлөөлсөн байж болно шүү.

Асуулт: 27 настай. 3 настай охинтой. Хоёр жилийн өмнө жирэмсэн болоод зулбуулах эм уусан. Үүнээс хойш хамгаалах юм хэрэглэхгүй байхад хүүхэд олохгүй байна. Миний сарын тэмдэг сар болгон ирж байгаа. Яагаад би хүүхэд олохгүй байгаа юм болоо ямар эмчилгээ хийлгэх вэ?

Хариулт: Чамайг ямар зулбуулдаг эм хэрэглэснийг мэдэхгүй байна л даа. Ер нь бол жирэмслэлтийг зулбуулдаг эм манай монголын зайлшгүй шаардлагатай эмийн жагсаалтад багтсан байдаг. Хамгийн гол нь эмчийн хяналтан дор найман долоо хоногоос доошхи жирэмслэлтэд хэрэглэдэг. Үүнээс хойш 7 хоногийн дараа заавал ЭХО-д харуулж юм үлдсэн байвал цэвэрлүүлэх шаардлагатай. Энэ эмийг мэс засал хийлгэх айдастай эмэгтэйчүүд ихэнхдээ хэрэглэдэг боловч сөрөг үр дагавар ихтэй. Удаан хугацаагаар савнаас цус гардаг учраас савны амсар удаан нээлттэй байж өгсөх замын халдвар орно. Түүнчлэн цус микроп үржих тэжээлт таатай орчин болдог учраас үрэвсэл үүсэх нөхцөл болдог. Тиймээс энэ эмийг хэрэглэсний дараа заавал үрэвслээс урьдчилан сэргийлэх курс эмчилгээ хийлгэдэг. Хэрвээ тэгэхгүй бол үрэвсэл даамжирч үргүйдэлд хүрэх аюултай. Тиймээс та мэргэжлийн эмчид хандаж нарийн шинжилгээнүүдийг шат дараалан өгөөд эмчилгээ хийлгэх хэрэгтэй.

Асуулт: 20 настайдаа трихомниазаар өвчилсөнөө мэдэлгуй удаж эмчлуулсэн. Хүнтэй суугаад 10 жил болсон хуухэд гарахгүй байна. Шинжилгээгээр суваг, өндгөвч зүгээр гэсэн одоо яах вэ?

Хариулт: Анхдагч үргүйдэлтийн асуудалтай юм байна. Үргүйдэлт гэж 2 хүний асуудал: 35% нь умайн гуурсан хоолойн битүүрэл бөглөрлөөс болдог, 15% өндгөвчний шалтгаантай байна, 10% эхнэр нөхөр 2-оос болсон асуудал байдаг, 5% нь бусад эрхтэн тогтолцооны асуудлаас болдог, үлдсэн 35% нь эрэгтэй хүнээс хамаардаг тул та өөрөө өндгөвч, гуурсан хоолой зүгээр гэсэн итгэлтэй байгаа бол нөхрөө үрийн шингэний шинжилгээ өгүүлээрэй. Таны тохиолдолд удсан трихомониаз хамаагүй.

Асуулт:Хамгаалалтгүй нэг жил нөхөртэйгээ унтаад хүүхэд олохгүй байна, эмч хойшоо савтай юм байна гэж байсан. Ийм савтай хүн бэлгийн ажлын дараа хөлөө сойж удаан хэвтвэл хүүхэдтэй болдог гэж үнэн үү? Хоёр өндгөвч наалдацгүй зүгээр байна гэсэн. Дааврын эм нэгийг уугаад их бөөлжсөн учраас дахин хэрэглэж чадаагүй. Одоо яах вэ?

Хариулт:Дэлхийн эрүүл мэндийн байгууллага, олон улсын эрдэмтдийн үзснээр нэг жил хамгаалалтгүй бэлгийн харьцаанд ороод жирэмслээгүй тохиолдолд үргүйдэл гэж үздэг. Үргүйдлийн шалтгааны 20 хувь нь хоёулангаас нь үүдэлтэй тул танд зөвлөхөд гэр бүлийн хүнтэйгээ хамт эмчид хандах цаг болжээ. Үргүйдэлд эмэгтэйчүүдээс маш олон төрлийн шалтгаан гардаг. Үрийн хоолойд өөрчлөлт, дааврын гаралтай үргүйдэл, төрөлхийн гаж өвчин, бэлэг эрхтний бүтцийн өөрчлөлт гээд л . Эрэгтэй талаас ч мөн эр бэлгийн эсгүй, үр тогтоох чадваргүй, даавар өөрчлөлттэй зэрэг олон шалтгаан байдаг юмаа.
Хойшоо байрлалтай умай гэдэг нь үргүйдэлд хүргэх шалтгаан биш. Үүнийг тухайн хүний биеийн онцлог гэж ойлгож болно. Хойшоо савтай эмэгтэйчүүд зөндөө л төрж байдаг шүү дээ. Хөлөө сойж хэвтэх арга байдаг ч эхлээд дээр дурьдсан олон шалтгааны алинаас болоод буйг мэргэжлийн эмчид үзүүлж оношлуулах шаардлагатай. Дааврын эмийг уухад дотор муухайрах нь элбэг үзэгдэл. Хамгийн зөв арга бол энэ эмийг хоол идсэний дараа унтахын өмнө уухад илүү хялбар байдаг.

Асуулт: Гэрлээд жил 6 сар болж байна. Өнгөрсөн 6 сараас хүүхэдтэй болохоор бэлгэвч хэрэглэхээ больсон. Бид хоёр өмнө нь хэн нь ч бэлгийн харьцаанд орж байгаагүй. Харин нөхөр маань арьс цагаарах өвчтэй, үүнээсээ болоод шодой нь цагаан өнгөтэй. Үүнээс болдог юм болов уу. Намайг мөн савны амсар улайсан гэсэн, үүнээс болдог юм болов уу?

Хариулт: Шинэ гэрлэсэн хосуудын дунд хийсэн эрдэмтдийн судалгаагаар эхний жилд 35 хувь, хоёр дахь жилдээ 20 хувь, гурав дахь жилдээ 10 хувь жирэмсэлж, жил өнгөрөх тусам буурах хандлагатай байдгийг тогтоосон. Энэ хоёрын хувьд үргүйдэл гэж хэлэхэд хэцүү, санаа зоволтгүй. Ахин хагас жил идэвхитэй бэлгийн харьцаанд байгаад үз. Тэгээд болохгүй бол эмчид ханд. Арьс цагаарах гэдэг бол үргүйдлийн шалтгаан биш арьсны бие даасан өвчин. Савны амсрын улайлт гэдэг үтрээний архаг үрэвсэлтэй байгаагийн шинж. Цаашлаад сав өндгөвчний үйл ажиллагааны алдагдал ч байж болох талтай. Тэгэхээр эмэгтэй та цаг алдалгүй тохирсон эмчилгээг хийлгээрэй.

Асуулт: Би 8 настай нэг хүүтэй, дахиад хүүхэд гаргах гээд хамгаалах эмээ уухаа болиод 6 сар болсон ч жирэмслэхгүй байна. Эмчид хэд хэдэн удаа үзүүлж эсийн шинжилгээ хийлгэсэн ч болохгүй юм. Хэд хоногийн өмнөөс цусны туяатай юм гарах боллоо. Энэ ямар учиртай юм бол. Сарын тэмдэг тогтмол ирдэг болохоор жирэмслэх хоногоо тааруулж секс хийгээд ч нэмэр алга. Эмч өндгөн эс боловсруулдаг гээд эм өгсөн ч тус болоогүй. Хамгаалах эмийг бараг 6 жил уусан, үүнээс болно гэж байх уу? Туслаач?

Хариулт: Ахиад 6 сар харах хэрэгтэй. Эсийн шинжилгээ гэдгийг сайн ойлгосонгүй. Өндгөн эсийн боловсролтыг хэлээд байгаа юм болов уу. Цусны туяатай юм гарна гэдэг савны амны шархлаа, өндгөвчний болон биеийн юмны хямрал байж болно. Тэгэхээр өндгөн эс боловсорч байна уу үгүй юу гэдгээ сарын тэмдгийн 11 дэх хоногоос манай эмнэлэгт /Амин маргад эмнэлэг: 320978/ ирж хянуулах боломжтой. Нөхрийн үрийн шинжилгээ өгч болно. Түүнд ямар нэг өөрчлөлт байж болно. Хамгаалах эм 6 жил уусан нь жирэмслэхгүй байх шалтгаан болохгүй. Өндгөн эс боловсруулдаг эм уусан ч тус болсонгүй гэж байна. Уучихаад тэрийгээ хянуулах шаардлагатай. Гэр бүлтэйгээ манайд хандаж үзүүлж болно.

Асуулт:Би 25 настай. 4 жилийн өмнө анхны жирэмслэлтээ үр хөндүүлсэн. Үүнээс хойш бэлгэвч, хуанлийн аргаар хамгаалж байсан. Гэхдээ хааяа нэг эрсдэлтэй үед ч жирэмсэн болоогүй. Харин сүүлийн 3 сар ямар ч хамгаалалт хэрэглээгүй ч жирэмсэн болохгүй байна. Жил гаруйн өмнө ерөндөг тавиулах гэтэл тавьж болохгүй өвдөөд эмч нь үрийн суваг битүүрсэн байна, сэтгүүл гэсэн юм. Гэтэл өөр нэг эмч сарын тэмдэг тогтвортой ирдэг л бол үрийн суваг битүүрээгүй гэж хэлсэн. Ойрын хугацаанд хүүхэдтэй болмоор байна. Хаана, ямар шинжилгээ өгч ямар эмчилгээ хийлгэх вэ?

Хариулт:Дөрвөн жилийн өмнө үр хөндүүлэх үед үрэвсэл, наалдац үүсэх, умайн хүзүүний салст бүрхэвч гэмтэх зэрэг өөрчлөлт орсон байхыг үгүйсгэх аргагүй. Хуанлиар хамгаалсан л гэнэ. Үнэхээр үр дүнтэй байсан эсэх нь эргэлзээтэй санагдлаа. Гурван сар жирэмсэн болох гээд болохгүй байна гэхээр таны биед үргүйдэлд хүрсэн ямар нэг шалтгаан байгаа болов уу. Ерөндөгний тухайд бүсгүй та буруу ойлголт авчээ. Үрийн сувгийг эмч хараад мэдэх ямар ч боломжгүй. Үүнийг тусгай рентген тодотгогч бодисын тусламжтайгаар шат дараалсан зураг авч нарийн шинжилгээгээр оношилдог. Тэгэхээр умайн хүзүүний суваг битүүрсэн гэснийг өөрөө үрийн суваг гэж ойлгосон байх. Умайн хүзүүний суваг битүүрсэн бол биений юм ирэхгүй умайн хөндийд хуримтлагдаж хүндрэл гардаг. Тэгэхээр биений юм ирж байсан учраас умайн хүзүүний суваг битүүрээгүй сэтгүүр хийлгэх шаардлагагүй гэж үзэж болно. Харин үрийн хоолой, өндгөвчний үйл ажиллагаагаа үзүүл. Өндгөвчний үйл ажиллагааны хяналтыг манай эмнэлэгт /”Амин маргад” эмнэлэг/ хандаж сарын тэмдгийн 11 дэх хоногоос эхлэн хийлгэж болно. Өөр ямар төрлийн шинжилгээ өгөхийг үүний дараа мэдэж болно. Ер нь ерөндөг тавьж болохооргүй өвдөнө гэдэг сав үрэвсэж өвчилсний илрэл юмаа.