Асуулт: 32 настай, нөхөргүй, төрж байгаагүй, жирэмсэлж байсан. Ихэвчлэн 14 хоног тутамд бэлгийн харьцаанд ордог, жирэмслэлтээс хамгаалах региведон гэдэг эмийг 3 жил уусан. Хэрэглэхээ болиод дөрвөн жил болж байна. Надад тохирсон жирэмснээс хамгаалах хамгийн тохирсон аргыг хэлж өгөөч. Энэ эмийг маш муу, дархлаа сулруулдаг, сексийн ханамж бууруулдаг, хавдар үүсгэдэг гэх юм.

Хариулт: Регивидеон даавар агуулсан бэлдмэл учраас сексийн ханамжийг бууруулж мэдэх юм. Харин дархлаа сулруулж, хавдар үүсгэхгүй. Миний бодлоор та трирегол, триквилар гэсэн шатлалтай эмүүдийг ууж болно. Гэхдээ тогтмол биш 14 хоногт цөөн удаа бэлгийн харьцаанд ордог бол фарматекс гэж лаа, эм, крем, тампон зэрэг сонголт сайтай орчин үеийн жирэмснээс хамгаалах бэлдмэл бий. Энэ бол ерөнхий биед нөлөөлөх хүчин зүйл байхгүй, хэсэг газар үйлчилж эр бэлгийн эсийг үхүүлдэг юм. Хэрвээ үүнийг сонговол та яг зааврын дагуу хэрэглээрэй, тэгвэл 98 хувь хүртэл хамгаалах чадвартай гэж үздэг.

Асуулт: Найз залуутайгаа бэлгэвчтэй секс хийдэг. Гэтэл саяхнаас бэлгэвчгүй хийдэг болсон. Найз маань гадуур нь тавьдаг. Би жирэмсэн болохоос айж байна. Урд нь ямар нэгэн эм, тариа, спираль хэрэглэж байгагүй. Алийг хэрэглэвэл дээр үү? туслаач

Хариулт: Залуу эмэгтэй танд зөвлөхөд гадуур тавих нь 100 хувь жирэмснээс хамгаалах арга болж чадахгүй. Энэ бол уламжлалт арга. Хэрэв үтрээнд ойрхон гадуур нь тавибал урсаж орох аюултай, мөн эрэгтэй хүний эхэн үед ялгардаг шингэнд эр бэлгийн эс агуулагддаг гэдгийг анхаарах хэрэгтэй. Ийм тохиолдолд жирэмсэн болсон хүмүүс байдаг. Хэрвээ байнга хавьталд байдаггүй, гэр бүл болоогүй бол фарматекс гэж хэсгийн үйлчилгээтэй жирэмснээс хамгаалах бэлдмэл лаа, тампон, крем, таблетик гэсэн төрлөөр байдаг. Аль эсвэл жирэмснээс хамгаалах олон төрлийн эмнээс сонгон хэрэглэ. Залуу охидын хувьд Диана-35 их тохиромжтой байдаг.

Асуулт: Би 22 настай, Төрж байгаагүй, нэг удаа үр хөндүүлсэн, Бэлгэвч, хуанлийн аргыг хэрэглэдэг ч сүүлийн үед сарын тэмдэг тогтворгүй 2 - 3 хоногоор зөрөх болсон учир өөр арга сонгох хэрэгтэй байна. СТ өвдөлттэй ирдэг. Эм уух юмуу тариа хийлгэмээргүй байна. Харин норплант гэж бугуйн суулгацыг сонирхож байна. Гэтэл сарын тэмдэг тогтворгүй болгож, жин нэмэгдүүлдэг гаж нөлөөтэй гэж сонссон. Мөн гаднаас харахад мэдэгддэг үү? Би ойрын 3 жилдээ жирэмсэлмээргүй байгаа учир надад зөвлөгөө өгөөч.

Хариулт: Норплант гэж суулгац бусад бэлдмэлээс ялгаагүй л үйлчилгээтэй бүгд л дааврын арга шүү дээ. Урт хугацааны үйлчилгээтэй депопроверан тариа болон норплант суулгацыг сөрөг үр дагавар ихтэй гэж үздэг. Биений юм ирүүлэхгүй болгох, сав жижгэрч хатингарших, нөхөн төлжилт нь муудах гэх мэт сөрөг үр дагавар илэрдэг. Тийм учраас залуу бүсгүйн хувьд бол эм уусан нь дээр болов уу. Одоо янз бүрийн эм орж ирж байна. Тураадаг, нүүрээр гарсан юмыг арилгадаг гэх мэт давхар үйлчилгээтэй нь ч байна. Норплант суулгацыг бугуйнд биш бугалганд суулгадаг юм.

Асуулт: Би 3 сарын өмнө спираль тавиулсан. Сүүлийн 1 сар нөхөр маань сексийн үед спираль мэдрэгдээд хатгаад байна гэх болсон. Яагаад ингэж байна? Спиралийг буруу тавьсан уу?

Хариулт: Спираль хэт наана тавигдсан байж болно. Эсвэл сүүлдээ сав базлаж спиралт доошилсон байх, эсвэл спиралийн сахлыг хэт богино, хэт урт тайрсанаас ийм асуудал үүснэ. Одоо та эхлээд ЭХО-д харуулаад дотуур үзлэг хийлгэж чухам яасныг мэднэ. Ер нь бол спиралийг маш сайн тааруулж тавих ёстой байдаг.

Асуулт: Би 24 настай. Регивидон, микрогинон уугаад бараг 2 жил болж байна. Энэ эмнүүд элэгний үйл ажиллагаанд муугаар нөлөөлдөг, олон жил уувал үргүй болгодог гэж сонссон. Урьд нь 2 удаа шарлаж байсан болохоор элэгээ муудах вий гэхээс айж байна. Бас үргүй болохоос. Одоохондоо би жирэмсэн болмооргүй байна. Би юу хэрэглэх вэ? /хүүхэд гаргаж байгаагүй. /

Хариулт: Жирэмснээс хамгаалсан хавсарсан бэлдмэлүүдийг элгэнд нөлөөлдөг гэж үздэг. Элэгний үйл муутай, урьд нь шарлаж байсан, аль эсвэл элэгний хатингаршилтай архаг өвчний суурьтай хүмүүс хэрэглэхгүй байвал зохино. Үргүйдэл хүргэдэг гэдэг нь батлагдсан, нотлогдсон зүйл биш. Жирэмснээс хамгаалах хэрэгслийн талаар олон сонголт байдаг учраас эмчтэй зөвлөж байгаад өөртөө тохирсон аргаа хэрэглэх нь зүйтэй.

Асуулт: Би одоо жирэмсэн 6 сартай, Хийсвэр хийлгэж төрнө яагаад гэвэл 2006-11 сард миом авахуулсан. Одоо төрөөд саваа боолгож болох уу? Ингэснээр биений юм хэвийн ирж зөвхөн жирэмсэн болохгүй гэж ойлгож болох уу?

Хариулт: Хэдэн хүүхэдтэй юм бол гэдэг нь сонин байна. Би таныг залуухан эмэгтэй гэж бодлоо. Би муу юм амлаж байгаа юм биш, гэхдээ амьдралд юу эс тохиолдохов. Үргүйдлийн эмчилгээ хийдэг эмчийн хувьд над дээр ийм асуудал зөндөө их ирдэг. Үрийн хоолойгоо боолгочихсон ингэчихлээ, тэгчихлээ гээд л. Миний хувьд үүнийг эсэргүүцдэг. Хүмүүс саваа боолгох гэж буруу ярьдаг. Энэ нь үрийн хоолойг тасдаад боохыг хэлж байгаа юм. Жирэмснээс хамгаалах өөр зөндөө арга байдаг шүү дээ. Үүнээс нэгийг нь сонгоод хэрэглэнэ биз дээ.

Асуулт: Би 22 настай. Жилийн өмнө 5 сарын зайтай 2 удаа үр хөндүүлсэн. Найз залуутай бид 3 жил хамт байгаа. Одоо жирэмслэлтээс хамгаалах Ревигдон эмийг үр хөндүүлсэнээсээ хойш одоог хүртэл ууж байгаа. Цаашид энэ эмийг үргэлжлүүлэн уух нь зөв үү? Аль эсвэл өөр хамгаалах ямар арга байгаа вэ?

Хариулт: Ямар нэг зовиургүй бол энэ эмийг ууж болно. Гэхдээ жилд ядаж ганц удаа эмэгтэйчүүдийн эмчид үзүүлж байх ёстой. Ялангуяа одоохондоо төрөөгүй, хоёр удаа аборт хийлгэж байсан бол нөхөн үржихүйн эрхтнүүд ямар байгааг үзүүлэх ёстой.

Асуулт: Би 26 настай. Ой 6 сартай хүүхэдтэй. Хүүхэдтэй болохоосоо өмнө 4 жил региведон уусан. Төрсөнөөс хойш жилийн дараа СТ ирсэн. Дахин ууж эхлээд одоо больсон. СТ алдагдаж, ходоод өвддөг болсон. Энэ эмийг янз бүрийн сөрөг муу нөлөөтэй тухай олж уншсан. Одоо надад ямар эм таарч тохирохыг хэлж өгөөч. Бусад аргыг хэрэглэмээргүй байна. Зөвлөгөө өгөөч.

Хариулт:Жирэмснээс хамгаалах олон янзын бэлдмэл бий. Уухаар, тарихаар, бугалганд суулгадаг, сүүлийн үед спираль дотор хүртэл эмийн бэлдмэл суулгасан байна. Энэ мэтээр янз бүр бий. Таны хувьд өөрөө уухыг илүүд үзэж байгаа бол гаж нөлөө багатайг нь сонгож хэрэглэ гэж хэлмээр байна. Сүүлийн үеийн хамгаалах эмүүдийн ихэнх нь давхар үйлчилгээтэй хавсарсан бэлдмэлүүд байгаа. Эрших үзэгдлийг багасгадаг, эндометройз өвчнийг эмчилдэг, тураадаг гэх мэт. Ер нь бол гурван пазтай буюу сарын тэмдгийн гурван пазад тохируулсан тун, дозтой эмүүд бий. Трирегол, триквилар гэх три гэсэн үг орсон нэртэй эмүүд байгаа та үүнээс авч хэрэглэвэл илүү тохиромжтой болов уу.

Асуулт: 25 настай, 3 настай хүүхэдтэй. Сүүлийн 1 жил жирэмслэхээс хамгаалах mecrogynon гэдэг эм ууж байгаа. Харин манай нөхөр эм уух маш муу ходоод муудаж хорт хавдар болох магадлал өндөр байдаг гээд хориглоод байна. Ер нь яг ямар аргаар жирэмслэхээс хамгаалбал хоргүй бас найдвартай вэ? Мирена ер нь хэр найдвартай вэ? Суулгасны дараа спираль шиг бөгсөн биеэр таргалж, СТ алдагдах болов уу? Ер нь энэ мирена хүний биед хэр зэрэг зохицох чадвартай бол? Хариулж өгч туслаач

Хариулт: Эм ууснаас ходоодын хорт хавдар болно гэж байхгүй шүү дээ. Мирена-гийн хувьд дотроо даавар агуулсан саванд байрлуулдаг орчин үеийн жирэмснээс хамгаалах бүтээгдэхүүн юм. Механик болон дааврын үйлчилгээг давхар үзүүлдэгээрээ онцлогтой. Таргалах асуудал гарахгүй ч, зарим хүний хувьд биений юм хоригдох шалтгаан болж болно. Үүнээс айх юм байхгүй.

Асуулт: Хуанлийн аргаар хамгаалдаг байсан, Саяхан Мари стопст охидын ерөндөг тавиулсан боловч бэлгийн хавьтлын үеэр найз залуугийн маань тээрхийг хатгаад байна гэх юм, Дахин очиж богиносгосон боловч нэмэр болсонгүй. Одоо бид хоёрын сексийн идэвхи буурч салах дээрээ тулаад байна. Одоо ямар арга хэмжээ авах вэ? Ойрдоо доошоогоо бор өнгөтэй ялгадас бага хэмжээтэй гараад байгаа.

Хариулт: Спираль наана тавигдах, эсвэл доошлох, утсыг нь хэт урт юмуу хэт богино тавьсан уу гэх мэт олон шалтгаантай байж болно. Үүнийг тавиулсан эмч дээрээ очиж үзүүлэх хэрэгтэй. Чухам яагаад ингэж зовиур өгөөд байгаа нь ЭХО-д харахад л мэдэгдэнэ. Бор өнгөтэй юм гарах нь савны үрэвсэл үүссэний шинж тэмдэг. Таны хувьд ЭХО-д болон толь тавьж харуулаад үрэвслийн эсрэг эмчилгээ хийлгэх хэрэгтэй. Ийм өчүүхэн зүйлээс болж сална гэдэг утгагүй зүйл шүү.